Hotel Merien Բարի Գործ հիմնադրամ
Ֆիլհարմոնիկը արցախյան հերոսներին նվիրված համերգով վերսկսում է համերգային գործունեությունը

Ֆիլհարմոնիկը արցախյան հերոսներին նվիրված համերգով վերսկսում է համերգային գործունեությունը

18:23 | 10.12.2020 | Մշակույթ

Հայաստանի ազգային ֆիլհարմոնիկ նվագախումբը հանդիսատեսի առջև իր դռները կբացի  արցախյան հերոսներին նվիրված համերգով:

Դեկտեմբերի 11-ին կհնչի Արամ Խաչատրյանի մոնումենտալ «Զանգերով» սիմֆոնիան, որն ազգային աղետի դեմ համառ պայքարի մարմնավորում է։ Կհնչի նաև Ալեքսանդր Հարությունյանի «Շեփորի կոնցերտը» (մենակատար՝ Կիրիլ Սոլդատով, դիրիժոր՝ Էդուարդ Թոփչյան):                     
    
«Անհամբեր սպասում ենք այս համերգին, երբ համերգասրահը կրկին կլցվի մեր հավատարիմ ունկնդրի ջերմ ներկայությամբ: Ամբողջական նվագախմբով «Արամ Խաչատրյան» համերգասրահում վերջին անգամ ելույթ ենք ունեցել մարտի 13-ին՝ մոտ 9 ամիս առաջ: Դեկտեմբերի 11-ի համերգին մեր նվագախմբի մեծ բարեկամ, վիրտուոզ շեփորահար Կիրիլ Սոլդատովի հետ կատարելու ենք հայկական դասական կոմպոզիտորական արվեստի լավագույն ստեղծագործությունները: Մեծ խոնարհմամբ համերգը նվիրում ենք Արցախում կռված մեր հերոս տղաներին, նրանց սխրանքը միշտ վառ պիտի պահենք մեր սրտերում և այնպես ապրենք, որ արժանի լինենք նրանց անձնազոհ ոգուն»,- նշում է ՀԱՖՆ գեղարվեստական ղեկավար և գլխավոր դիրիժոր Էդուարդ Թոփչյանը:

ՀԱՖՆ-ը վերսկսում է նաև «Ուխտագնացություն դեպի Բեթհովեն» փառատոնի ծրագրերը. Բեթհովենի ծննդյան օրը՝ դեկտեմբերի 16-ին, կներկայացվեն մեծ կոմպոզիտորի թիվ 5 և 6, իսկ դեկտեմբերի 17-ին՝ թիվ 1 և 4 սիմֆոնիաները:

Անտեսված չեն մնա նաև Ֆիլհարմոնիկի մանկահասակ ունկնդիրները. դեկտեմբերի 23-ից 26-ը՝ ժամը 19:00-ին, «Արամ Խաչատրյան» համերգասրահում կհնչեն հատվածներ Չայկովսկու հեքիաթային «Շչելկունչիկ» բալետից, սպասվում են նաև բազմաթիվ անակնկալներ:

Համերգների ընթացքում կպահպանվեն հակահամաճարակային բոլոր կանոնները:

Լրահոս


Միակ Էկոնոմ դասի ավտովարձույթը Հայաստանում
Стоматологический центр Медеси