Hotel Merien Բարի Գործ հիմնադրամ
Զինված ուժերը կարող են օգտագործվել ներպետական կարևորագույն խնդիրներ լուծելու համար. Հայկ Ալումյան

Զինված ուժերը կարող են օգտագործվել ներպետական կարևորագույն խնդիրներ լուծելու համար. Հայկ Ալումյան

12:50 | 27.08.2019 | Հասարակություն

Մարտի 1-ի իրադարձությունների շուրջ ձևավորվել են բազմաթիվ միֆեր, որոնցից մեկն այն է, որ մեր Սահմանադրությունը թույլ չի տալիս Զինված ուժերն օգտագործել ներպետական հարցերում, օրինակ՝ զանգվածային անկարգությունները կանխելու նպատակով, այսօր տեղի ունեցած մամուլի ասուլիսի ժամանակ ասաց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։

«Սա միֆ է, և այսօր դատարանում քննվող քրեական գործը շատ մեծ չափով հիմնված է այս միֆի վրա։ Իրականում, մեր օրենսդրությունը միանշանակ թույլ է տալիս Զինված ուժերն օգտագործել ներպետական կարևորագույն խնդիրներ լուծելու համար, օրինակ, եթե առկա են զանգվածային անկարգություններ»,- ասաց փաստաբանը՝ միաժամանակ ներկայացնելով Չինաստանի, Նեպալի, Հարավաֆրիկյան Հանարապետության, Հնդկաստանի և մի շարք այլ երկրների միջազգային փորձը։

Հայկ Ալումյանը նաև հղում կատարեց ՀՀ Սահմանադրության 8.8-րդ հոդվածին, որտեղ նշված է, որ Զինած ուժերը ապահովում են Հայաստանի Հանրապետության անվտանգությունը, պաշտպանությունը և տարածքային անվտանգությունը։

«Իսկ ի՞նչ է անվտանգությունը։ Այն ներքին և արտաքին վտանգներից պաշտպանվելու հնարավորություն է։ Անվտանգությունը կարող է խախտվել զանգվածային անկարգությունների հետևանքով», - նշեց փաստաբանը։

Ալումյանի խոսքով, Մարտի 1-ի իրադարձություններից հետո՝ 2012 թվականին, ընդունվել է արտակարգ դրության ռեժիմի մասին օրենք, որում արդեն ուղիղ գրված է Զինված ուժերը ներքին խնդիրների լուծմանը ներգրավելու իրավունքի մասին. այնպես որ, ՀՀ օրենսդրությունը, միանշանակ, թույլ է տալիս Զինված ուժերի օգտագործումը զանգվածային անկարգությունները դադարեցնելու համար։

«Մինչև 2008 թվականի Մարտի 1-ը մենք ունեցել ենք այդպիսի հարցերում բավականին մեծ փորձ։ Օրինակ՝ Արմավիրի մարզի Ջանֆիդա և Շատավան գյուղերում զինված խմբավորումների հրահրած հակահասարակական գործողությունները կանխելու նպատակով արտակարգ դրություն է հայտարարվել մեկ ամիս ժամանակով։ Սույն հրամանագրի պարտականությունը դրվել է ՀՀ ներքին զորքերի, ՊՆ-ի և ԱԱԾ-ի պետական վարչության վրա։ Հրամանագիրն արձակված է ՀՀ առաջին նախագահ Լևոն Տեր-Պետրոսյանի կողմից՝ 1993 թվականի փետրվարի 8-ին», - ասաց փաստաբանը։

Հայկ Ալումյանը ուշադրություն հրավիրեց այն հանգամանքի վրա, որ 2008 թվականի մարտի 1-ի իրադարձությունների ժամանակ ՀՀ Զինված ուժերը հավաքված քաղաքացիների հետ ուղիղ կոնտակտի մեջ չեն եղել, այլ տեղակայվել են հավաքված բազմությունից հեռու տարածությունների վրա։

«Այսօրվա գլխավոր մեսիջը հետևյալն է. Զինված ուժերը կարող էին օգտագործվել անգամ ցույցերն անմիջապես ցրելու նպատակով, սակայն Զինված ուժերն ընդամենը տեղակայվել են բախումների կանխարգելման նպատակով։ Զինծառայողներին կրակելու հրաման տրված չի եղել», - շեշտեց փաստաբանը։

Լրահոս


Միակ Էկոնոմ դասի ավտովարձույթը Հայաստանում
Стоматологический центр Медеси